Plantun de Prouvènço

Pèr coumpara dos planto d'encò nostre

Molinia caerulea subsp. caerulea & Typha domingensis

Coutelino

Molinia caerulea subsp. caerulea

Poaceae Graminaceae

Àutri noum : Erbo-dóu-tai, Erbo-de-tai.

Noms en français : Canche bleue, Molinie bleue.

Descripcioun :
L'erbo-dóu-tai vo coutelino, trachis en mato dins li relarg umide. Li cambo soun duro, li fueio larjo e coupanto alor que lis espigueto, à 2 o 3 flour, soun pichouneto. Sa lengueto (ligulo) èi facho d'un renguiero de péu. La subsp. caerulea a de fueio pas trop larjo (2 à 8 mm) e peréu si lemma soun mens longo (3 à 5 mm) e mens pounchudo que la subsp. arundinacea. Es uno planto pu bluio e pu pichoto que trachis pulèu en mountagno. Coumpara emé la subsp. arundinacea que ié sèmblo.

Usanço :
La coutelino s'acampo pèr la banastarié, pèr faire d'ùni causo pulèu menudo.

Port : Grando erbo
Taio : 0,5 à 1,5(2,5) m
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Molinia
Famiho : Poaceae
Famiho classico : Graminaceae

Ordre : Poales

Coulour de la flour : Vióuleto
Petalo : ges
Ø (o loungour) enflourejado : 30 à 50 cm
Flourido : Printèms - Estiéu

Sòu : Ca
Autour basso e auto : 0 à 2300 m
Aparado : Noun

Liò : Prado palustro - Prado umido - Palun tourbous
Estànci : Mesoumediterran à Subaupen
Couroulougi : Bourealo
Ref. sc. : Molinia caerulea subsp. caerulea (L.) Moench., 1794

Paviho-rousso

Typha domingensis

Typhaceae

Àutri noum : Fielouso, Filouso, Masseto, Cire, Sagno.

Nom en français : Massette australe.

Descripcioun :
Coume tóuti li Typha, la paviho-rousso se recounèis à sis espigo femello e masclo. N'i'a cinq meno de Typha ; aquelo se destrìo, de segur de la coulour de l'espigo femello, rousso, mai peréu de si fueio pas trop largo e en mié-ciéucle en coupo, e tambèn de la loungour de separacioun entre li dos espigo (2 cm). Li fueio an d' auriheto gaire redouno au contro de T. angustifolia (vèire lou dessin).

Usanço :
Li fueio de paviho podon èstre utilisado pèr lou sagnage di cadiero e li flour pèr rempli li matalas. Se saup mens que li brout soun manjadis coume d'espargo. Se pòu faire de farino emé li racino e uno meno de pan emé l'agriero.